Están abertas, ata o próximo 7 de setembro de 2026, as candidaturas á Call for Visitors da iniciativa Border Regions Peer Exchange on Solving Border Obstacles, promovida pola Comisión Europea, a través da Dirección Xeral de Política Rexional e Urbana (DG REGIO), en colaboración coa Fundación CEER.

A iniciativa ofrece a representantes de entidades implicadas na cooperación transfronteiriza a oportunidade de participar en visitas de intercambio a diferentes rexións fronteirizas europeas, co obxectivo de coñecer solucións desenvolvidas para responder aos obstáculos comúns que afectan á cooperación territorial.

Ao longo do programa realizaranse 10 visitas de intercambio, entre novembro de 2026 e xaneiro de 2027, dedicadas a diferentes ámbitos, entre eles a xestión ambiental, a saúde, os servizos públicos, os transportes, o turismo, a seguridade social e a gobernanza territorial.

Entre os territorios seleccionados para acoller estas visitas atópase a AECT Rio Minho, que recibirá participantes os días 16 e 17 de novembro de 2026.

A visita ao territorio do Rio Minho terá como base o caso “Minho River Nature 2000 – Boosting cross-border multi-level governance”, desenvolvido no marco da iniciativa b-solutions, e permitirá coñecer a experiencia de cooperación transfronteiriza na xestión da Rede Natura 2000, con especial atención á coordinación institucional entre Portugal e España e ás solucións impulsadas para responder aos desafíos comúns de gobernanza ambiental.

A Call for Visitors diríxese, entre outras entidades, a autoridades nacionais, rexionais e locais, autoridades de xestión e secretariados conxuntos dos programas Interreg A, Agrupamentos Europeos de Cooperación Territorial (AECT), Eurocidades, Eurorrexións, universidades, centros de investigación, axencias de desenvolvemento, cámaras de comercio e outras organizacións con actividade no ámbito da cooperación transfronteiriza.

As persoas seleccionadas poderán beneficiarse dun apoio económico de ata 750 euros para cubrir os gastos de desprazamento e aloxamento.

As candidaturas permanecerán abertas ata as 17:00 horas (CEST) do 7 de setembro de 2026.

Máis información e candidaturas

https://visitors.borderexchange.fceer.org/